ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នឹងរៀបចំព្រឹត្តិការណ៍ «ពិព័រណ៍វារីវប្បកម្មកម្ពុជាលើកទី១» នៅថ្ងៃទី៦-៧ ខែធ្នូ ឆ្នាំ២០២៤ ដើម្បីជំរុញការធ្វើទំនាក់ទំនង និងកិច្ចសហការរវាងភាគីពាក់ព័ន្ធក្នុងខ្សែច្រវាក់តម្លៃវារីវប្បកម្ម។

ពិព័រណ៍ «វារីវប្បកម្មកម្ពុជាលើកទី១» ដែលធ្វើនៅផ្សាររាត្រីសាន់សាញ បឹងកក់ រាជធានីភ្នំពេញនេះ នឹងបង្កើនការយល់ដឹងជាសាធារណៈ អំពីគុណភាពត្រីចិញ្ចឹមរបស់កម្ពុជា និងលើកកម្ពស់ការយល់ដឹងអំពីចំណី ពូជ ការផ្គត់ផ្គង់ និងបច្ចេកវិទ្យាថ្មីៗដែលប្រើប្រាស់ក្នុងវារីវប្បកម្ម។

ពិព័រណ៍ខាងលើនេះ នឹងចូលរួមបង្កើតយន្តការផ្សព្វផ្សាយ ការចែករំលែកចំណេះដឹង បទពិសោធ និងមេរៀនក្នុងការអភិវឌ្ឍប្រព័ន្ធទីផ្សារវារីវប្បកម្មកម្ពុជាផងដែរ៕