ភ្នំពេញ៖ ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ចែកស្រូវពូជចំនួន ៤៦៧,២តោន ដល់ប្រជាកសិករចំនួន ៤ ៦៧២គ្រួសារ មកពី ៧ក្រុង-ស្រុក ក្នុងខេត្តកំពង់ធំ ដែលរងផលប៉ះពាល់ដោយសារគ្រោះទឹកជំនន់។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី១៨ ខែតុលា ឆ្នាំ២០២៤។

ក្នុងឱកាសចុះសួរសុខទុក្ខប្រជាពលរដ្ឋនៅសាលាស្រុកកំពង់ស្វាយ ខេត្តកំពង់ធំនេះ ឯកឧត្តម ឌិត ទីណា ក៏បានលើកឡើងថា រាជរដ្ឋាភិបាល បានដាក់ចេញនូវកម្មវិធីគោលនយោបាយអាទិភាព ក្នុងការរក្សាស្ថេរភាពថ្លៃកសិផល កាត់បន្ថយថ្លៃដើមផលិត ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើបផងដែរ។

ឯកឧត្តម ឌិត ទីណា ក៏បានបន្តថា ការដាក់កម្មវិធីគោលនយោបាយអាទិភាពនេះ នឹងជួយគាំទ្រលើផ្នែកបច្ចេកទេស ការផ្តល់ព័ត៌មាន ការប្រឹក្សាយោបល់ និងការជួយដោះស្រាយបញ្ហាពាក់ព័ន្ធកសិកម្ម ដែលមានគោលបំណងបង្កើនផលិតភាពកសិកម្ម ជំរុញជីវភាព ធានាបាននូវសន្តិសុខ និងសុវត្តិភាពស្បៀង។ ក្នុងឱកាសនោះ រដ្ឋមន្ដ្រីក្រសួងកសិកម្ម ក៏បានអំពាវនាវឱ្យប្រជាកសិករ ចូលរួមស្តាប់ការណែនាំរបស់ក្រសួងស្ថាប័នពាក់ព័ន្ធពីការព្យាករណ៍ធាតុអាកាស បម្រែបម្រួលអាកាសធាតុ ដើម្បីចូលរួមកាត់បន្ថយនូវផលប៉ះពាល់ ដែលមិនធ្វើឱ្យប្រថុយក្នុងការធ្វើស្រែ៕