ភ្នំពេញ៖ ក្រុមហ៊ុនកម្ពុជាជាង ៥០ក្រុមហ៊ុន និងក្រុមហ៊ុនអាម៉េរិក ផ្នែកនាំចូល ចែកចាយ និងផ្សារទំនើប ជាច្រើនក្រុមហ៊ុន បានពិភាក្សាគ្នានាំយកផលិតផលកម្ពុជាក្នុងវិស័យម្ហូបអាហារ និងផលិតផលកសិកម្ម ចូលទៅក្នុងទីផ្សារអាម៉េរិក។ នេះបើតាមការចុះផ្សាយរបស់សភាពាណិជ្ជកម្ម នាថ្ងៃទី២០ ខែកញ្ញា ឆ្នាំ២០២៤។

ក្នុងជំនួបពាណិជ្ជកម្មអាម៉េរិក-កម្ពុជាឆ្នាំ២០២៤ នៅទីក្រុងឡុងប៊ិច រដ្ឋកាលីហ្វ័រញ៉ា នាថ្ងៃទី១៩ កញ្ញានេះ គឺបានចូលរួមចំណែកយ៉ាងសំខាន់ក្នុងការពង្រឹងទំនាក់ទំនងសេដ្ឋកិច្ចរវាងប្រទេសកម្ពុជា និងសហរដ្ឋអាម៉េរិក។ ជំនួបពាណិជ្ជកម្មអាម៉េរិក-កម្ពុជាឆ្នាំ២០២៤នេះ មានការចូលរួមពីបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា លោកស្រី ហ្វ័រណាម៉ា ប្រធានរតនាគាររដ្ឋកាលីហ្វ័រញ៉ា និងធុរជនកម្ពុជា-អាម៉េរិកសរុបជាង ១០០នាក់។

គួរបញ្ជាក់ថា រយៈពេល ៨ខែ ក្នុងឆ្នាំ២០២៤ កម្ពុជា សម្រេចបានទំហំពាណិជ្ជកម្មជាមួយសហរដ្ឋអាម៉េរិកជាង ៦,៩២ពាន់លានដុល្លារ ដែលក្នុងនោះ សម្រេចបានការនាំចេញជាង ៦,៧៤ពាន់លានដុល្លារ និងការនាំទំនិញចូលសម្រេចបានជាង ១៧៣ពាន់លានដុល្លារ។ ទំហំពាណិជ្ជកម្មដែលកម្ពុជា សម្រេចបានជាមួយអាម៉េរិកជាង ៦,៩២ពាន់លានដុល្លារនេះ មានការកើនឡើងចំនួន ១០,៤% បើធៀបនឹងរយៈពេលដូចគ្នាក្នុងឆ្នាំ២០២៣៕