ភ្នំពេញ៖ ពិធីសារទី៥ ស្ដីពីវិសោធនកម្មកិច្ចព្រមព្រៀងវិនិយោគទូលំទូលាយអាស៊ាន នៅប្រទេសឡាវ នឹងបង្កើតនូវបរិស្ថានវិនិយោគដែលសេរី ងាយស្រួល តម្លាភាព និងប្រកួតប្រជែងនៅក្នុងអាស៊ាន។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃ១៦ ខែកញ្ញា ឆ្នាំ២០២៤។

ការបង្កើតនូវបរិស្ថានវិនិយោគលើការប្រកួតប្រជែងនៅក្នុងអាស៊ាននេះ គឺប្រកាន់ខ្ជាប់នូវគោលការណ៍មួយចំនួនដែលផ្តល់នូវអត្ថប្រយោជន៍ដល់វិនិយោគិន និងការវិនិយោគដែលមានមូលដ្ឋាននៅក្នុងអាស៊ាន។ ពិធីសារទី៥ ស្ដីពីវិសោធនកម្មកិច្ចព្រមព្រៀងវិនិយោគទូលំទូលាយអាស៊ាននេះ គឺចុះហត្ថលេខាដោយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជារដ្ឋមន្ត្រីសេដ្ឋកិច្ចអាស៊ានតំណាងកម្ពុជា។

ជាមួយគ្នានេះ លោកជំទាវ ចម និម្មល ក៏បានចូលរួមជាសក្ខីភាពក្នុងពិធីប្រគល់-ទទួលពិធីសារនេះរវាងឯកឧត្តមប្រធានកិច្ចប្រជុំរដ្ឋមន្ត្រីសេដ្ឋកិច្ចអាស៊ានឆ្នាំ២០២៤ និងឯកឧត្តមអគ្គលេខាធិការអាស៊ានផងដែរ៕