ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ របស់កូរ៉េខាងត្បូង នៅថ្ងៃទី១២ ខែកញ្ញា ឆ្នាំ២០២៤។ សម្តេចតេជោ ហ៊ុន សែន បានចាត់ទុកសញ្ញាបត្របណ្ឌិតកិត្តិយសនេះ ជាសមិទ្ធផលរបស់អ្នកដែលបានពលីជីវិតក្នុងបុព្វហេតុសន្តិភាព ឯករាជ្យ បូរណភាពទឹកដី និងភាពសុខសាន្តនៃប្រជាជាតិកម្ពុជា។

សម្តេចតេជោ ហ៊ុន សែន បានធ្វើបាឋកថាស្តីពី«បទពិសោធរបស់កម្ពុជា ក្នុងការរំដោះជាតិ ការកសាងសន្តិភាព ការផ្សះផ្សារ និងកសាងជាតិឡើងវិញ» យ៉ាងដូច្នេះថា៖«សម្រាប់កម្ពុជា សញ្ញាបត្រនាពេលនេះ ជាការទទួលស្គាល់គុណតម្លៃថ្នាក់ដឹកនាំរបស់កម្ពុជា ក្នុងការកសាងសន្តិភាពជាតិ ដែលអាចផ្តល់ប្រយោជន៍យ៉ាងសំខាន់សម្រាប់បណ្តុះបណ្តាលសន្តិភាព បង្រួបបង្រួមជាតិ ការអភិវឌ្ឍ និងកិច្ចសហប្រតិបត្តិការនៅលើមជ្ឈដ្ឋានអន្តរជាតិ»។

សម្តេចតេជោ ហ៊ុន សែន ក៏បានបញ្ជាក់ថា សញ្ញាបត្រនេះក៏ជាសក្ខីភាពបង្ហាញថាអ្វីដែលរដ្ឋាភិបាលកម្ពុជា ខិតខំធ្វើកន្លងមក ជាការដើរលើមាគ៌ាដ៏ត្រឹមត្រូវបំផុតសម្រាប់សន្តិភាពជាតិ និងអន្តរជាតិ»៕