ភ្នំពេញ៖ រយៈពេល ៨ខែ ឆ្នាំ២០២៤ កំពង់ផែស្វយ័តភ្នំពេញ (PPAP) រកចំណូលបានជាង ២៧,១៧លានដុល្លារ ដែលកើនឡើងចំនួន ១៥% បើធៀបនឹងរយៈពេលដូចគ្នាក្នុងឆ្នាំ២០២៣ មានចំនួនជាង ២៣,៥៥លានដុល្លារ។ បើតាមសេចក្តីប្រកាសព័ត៌មានរបស់ PPAP ចេញផ្សាយនាថ្ងៃទី០៩ ខែកញ្ញា ឆ្នាំ២០២៤ ចំណូលក្នុងរយៈពេល ៨ខែនេះ គឺមិនទាន់ធ្វើសវនកម្មទេ។

កំពង់ផែស្វយ័តភ្នំពេញ បានឱ្យដឹងថា ចំណូលដែលប្រមូលបានជាង ២៧,១៧លានដុល្លារ មានដូចជា៖ ចំណូលពីប្រតិបត្តិការផែ(Port Operation) មានចំនួនជាង ២២,៥៥លានដុល្លារ, ចំណូលពីអាជ្ញាធរផែ (Port Authority) មានទំហំជាង ៣,៦៥ លានដុល្លារ និងចំណូលពីសេវាកម្មផ្សេងៗ (Other Services) មានទឹកប្រាក់ជាង ៩៦៣ពាន់ដុល្លារ។ ចំពោះ ចំណូលប្រចាំខែសីហាវិញ PPAP ប្រមូលបានជាង ៤,៤១ លានដុល្លារ មានការកើនឡើង ២៥% បើធៀបនឹងរយៈពេលដូចគ្នាក្នុងឆ្នាំ២០២៣ មានទំហំជាង ៣,៥២លានដុល្លារ។

រីឯ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញ ក្នុងរយៈពេល ៨ខែ ឆ្នាំ២០២៤ មានចំនួន៣១៣ ៧០៤ ទូ(TEUs) កើនឡើងជិត ១៧% បើធៀបនឹងរយៈពេលដូចគ្នានៅឆ្នាំ២០២៣ ខណៈដែល បរិមាណកុងតឺន័រ ដែលឆ្លងកាត់ក្នុងខែសីហា មានចំនួន ៥៣ ៨២៥ ទូ (TUEs) កើនឡើងបាន ២៥,៤៦%៕