ភ្នំពេញ៖ លោកជំទាវ Flerida Ann P.Mayo ឯកអគ្គរដ្ឋទូតវិសាមញ្ញនៃសាធារណរដ្ឋហ្វីលីពីន ប្រចាំកម្ពុជា បានលើកឡើងពីសំណើបន្តពង្រឹងអនុស្សរណៈយោគយល់ (MOU) រវាងប្រទេសហ្វីលីពីន-កម្ពុជា ដើម្បីបង្កើនកិច្ចសហប្រតិបត្តិការវិនិយោគលើវិស័យកសិកម្ម និងកសិពាណិជ្ជកម្មនៅកម្ពុជា។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី៤ ខែកញ្ញា ឆ្នាំ២០២៤។

ក្នុងជំនួបនៅទីស្តីការក្រសួងកសិកម្ម ជាមួយលោកជំទាវ Flerida Ann P.Mayo ឯកឧត្តមរដ្ឋមន្ត្រី ឌិត ទីណា រដ្ឋមន្ត្រីក្រសួងកសិកម្ម បានស្វាគមន៍ហ្វីលីពីនក្នុងការមកបន្តពង្រឹងកិច្ចសហប្រតិបត្តិការរវាងប្រទេសទាំងពីរ និងជំរុញការវិនិយោគលើវិស័យស្រូវអង្ករនិងម្រេចពីកម្ពុជាទៅកាន់ប្រទេសហ្វីលីពីន។ ទាក់ទងនឹងការវិនិយោគនេះ ឯកឧត្តមរដ្ឋមន្ត្រីកសិកម្ម ណែនាំឱ្យភាគីហ្វីលីពីនសហការជាមួយសហព័ន្ធស្រូវអង្ករកម្ពុជា ដើម្បីមានបទពិសោធវេចខ្ចប់ និងបច្ចេកទេសនាំចេញស្រូវអង្ករទៅក្រៅប្រទេស ព្រមទាំងសិក្សាពីនីតិវិធីអនាម័យ ភូតគាមអនាម័យ និងច្បាប់រវាងប្រទេសទាំងពីរឱ្យបានច្បាស់លាស់។

ឯកឧត្តមរដ្ឋមន្ត្រី ឌិត ទីណា គូសបញ្ជាក់ចំពោះសំណើបន្តពង្រឹងអនុស្សរណៈយោគយល់ ដោយក្នុងនោះត្រូវផ្តោតលើអ្វីដែលភាគីទាំងពីរអាចធ្វើបានជាមួយគ្នា ពិសេសជំរុញការធ្វើកសិពាណិជ្ជកម្មឱ្យចេញជារូបរាងពិតប្រាកដ ដែលមានភាពបុរេសកម្ម និងមានប្រសិទ្ធភាព។ ឯកឧត្តមរដ្ឋមន្ត្រី ឌិត ទីណា ក៏បានបន្ថែមថា កម្ពុជាស្វាគមន៍វិស័យឯកជន ដែលមានបំណងវិនិយោគលើវិស័យស្រូវអង្ករ ហើយកម្ពុជាមានកសិផលដែលមានគុណភាពល្អ ប្រណិត សម្រាប់ផ្គត់ផ្គង់ដល់ការនាំចេញទៀតផង៕