ភ្នំពេញ៖ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានហាមឃាត់គ្រឹះស្ថានធនាគារ និងហិរញ្ញវត្ថុដែលជាសមាជិកទាំងអស់ មិនឱ្យទទួលយកអត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ លិខិតឆ្លងដែន សំបុត្រកំណើត និងបណ្ណសមធម៌ របស់ប្រជាពលរដ្ឋមកធ្វើជាការធានាលើការផ្តល់ឥណទានជាដាច់ខាត។ តាមសេចក្តីជូនដំណឹងរបស់ ABC និង CMA ការហាមឃាត់បែបនេះ ដើម្បីបន្តពង្រឹងការអនុវត្តការធ្វើអាជីវកម្មប្រកបដោយការទទួលខុសត្រូវខ្ពស់ និងកិច្ចការពារអតិថិជនរបស់គ្រឹះស្ថានធនាគារ និងហិរញ្ញវត្ថុ។

ដើម្បីធានានូវប្រសិទ្ធភាពនៃប្រតិបត្តិការអាជីវកម្មធនាគារ និងមីក្រូហិរញ្ញវត្ថុ ប្រកបដោយការទទួលខុសត្រូវខ្ពស់ និងកិច្ចការពារអតិថិជនក្រុមប្រឹក្សាភិបាលនៃសមាគមទាំងពីរ បានអនុម័តលើវិធានការដូចជា៖ គ្រឹះស្ថានធនាគារ មិនត្រូវទទួលយកដីកម្មសិទ្ធិសមូហភាព រួមមាន៖ ដីឯកជនរបស់រដ្ឋ និងដីសាធារណៈរបស់រដ្ឋ ដែលបានចុះបញ្ជីរួចជាមួយរដ្ឋមកធ្វើជាទ្រព្យធានាឥណទានថ្មីទេ។

ក្នុងករណីដែលគ្រឹះស្ថានកំពុងមានទ្រព្យធានាជាប្រភេទដីទាំងនោះ គ្រឹះស្ថានធនាគារមិនត្រូវប្រើវិធីសាស្ត្រលក់ដោយបង្ខំ ឬលើកទឹកចិត្តឱ្យអតិថិជនលក់ដាច់ខាត ដែលក្នុងនោះគ្រឹះស្ថានធនាគារ ត្រូវប្រគល់វិញ្ញាបនបត្រសម្គាល់កម្មសិទ្ធិ ដែលបានដាក់ជាទ្រព្យធានាឥណទានទាំងនោះ ទៅឱ្យអតិថិជនវិញ ក្រោយពេលឥណទាននោះត្រូវបានបញ្ចប់។ ចំពោះ ការផ្តល់ឥណទានលើគ្រួសារដែលមានបណ្ណសមធម៌ ត្រូវធ្វើឡើងដោយមានការវាយតម្លៃលទ្ធភាពសងឥណទានឱ្យបានត្រឹមត្រូវ និងហ្មត់ចត់ ចៀសវាងការផ្តល់ឥណទាន ដែលមានទំហំលើសពីសមត្ថភាព។

ដើម្បីបន្តការធានានូវបរិយាបន្នហិរញ្ញវត្ថុ ចំពោះពលរដ្ឋដែលកំពុងអាស្រ័យផលលើដី កម្មសិទ្ធិសមូហភាព ដូចជា ដីឯកជនរបស់រដ្ឋ និងដីសាធារណៈរបស់រដ្ឋដែលបានចុះបញ្ជីរួចហើយជាមួយរដ្ឋ និងពលរដ្ឋដែលមានបណ្ណសមធម៌នោះ ក្រុមប្រឹក្សាភិបាលនៃសមាគមទាំងពីរ បានលើកទឹកចិត្តដល់គ្រឹះស្ថានដែលជាសមាជិក ត្រូវបន្តផ្តល់ឥណទានដល់អតិថិជនតាមរយៈ ការផ្តល់ឥណទានដោយគ្មានទ្រព្យធានា និងត្រូវមានការវាយតម្លៃលទ្ធភាពបង់សងត្រឡប់ប្រកបដោយការប្រុងប្រយ័ត្នខ្ពស់។ ABC និង CMA បានបញ្ជាក់ថា វិធានការខាងលើ គឺជាយន្តការពង្រឹងបន្ថែមលើយន្តការដែលមានស្រាប់ ដើម្បីធានាឱ្យវិស័យធនាគារ និងហិរញ្ញវត្ថុ មានភាពរឹងមាំ និរន្តរភាព ការទទួលខុសត្រូវខ្ពស់ និងកិច្ចការពារអតិថិជន៕