ភ្នំពេញ៖ កម្ពុជា នឹងទទួលរងសម្ពាធទាប គ្របដណ្តប់ពីសមុទ្រចិនខាងត្បូង ឈូងសមុទ្រថៃភាគកណ្តាលនៃអាងទន្លេមេគង្គ ដែលបង្កឱ្យតំបន់វាលទំនាប តំបន់ខ្ពង់រាប និងតំបន់មាត់សមុទ្រ នឹងមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ រយៈពេល ៣ថ្ងៃ ចាប់ពីថ្ងៃទី០២ ដល់ទី៤ ខែសីហា ឆ្នាំ២០២៤។

តាមការចុះផ្សាយនាថ្ងៃទី០១ សីហា ក្រសួងធនធានទឹក និងឧតុនិយម បានព្យាករណ៍ថា តំបន់វាលទំនាប នឹងមានខ្យល់បក់ មកពីទិសបស្ចិម និងពាយ័ព្យ ក្រោមល្បឿនមធ្យម២,៥០ម៉ែត្រ/វិនាទី ដោយមានតុណ្ហភាពពី ២៤ទៅ ៣៣អង្សាសេ។ ខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល និងភ្នំពេញ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្តប់លើផ្ទៃដី១០%។

រីឯតំបន់ខ្ពង់រាប នឹងមានសីតុណ្ហភាពពី ២៣ទៅ ៣២ អង្សាសេ ដែលមានខ្យល់បក់ពីទិសនិរតី និងទិសបស្ចិមមានល្បឿនមធ្យម ៣,៥០ម៉ែត្រ/វិនាទី ក្នុងនោះខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្តប់លើផ្ទៃដី២០%។

ចំពោះ តំបន់មាត់សមុទ្រ មានដូចជា៖ ខេត្តកោះកុង ព្រះសីហនុ កំពត និងជួរភ្នំបូកគោ នឹងមានសីតុណ្ហភាពពី ២៣ទៅ ៣១អង្សាសេ ដោយមានខ្យល់បក់មកពីទិសបស្ចិម និងពាយ័ព្យមានល្បឿន មធ្យម ២,៥០ម៉ែត្រ/វិនាទី ខណៈដែលអាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើផ្ទៃដី១០%។ រលកសមុទ្រ នឹងមានកម្ពស់ពី ០,៥០ម៉ែត្រ ទៅ ១,៥០ម៉ែត្រ៕