ភ្នំពេញ៖ អាកាសយានដ្ឋានអន្តរជាតិសៀមរាបអង្គរ ទទួលបានជើងហោះហើរចន្លោះពី១៤-១៩ ជើងហោះហើរក្នុងមួយថ្ងៃ ក្នុងនោះមានជើងហោះហើរពីបាងកកច្រើនជាងគេ គឺពី៥-៦ជើង ក្នុងមួយថ្ងៃ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី៤ ខែកក្កដា ឆ្នាំ២០២៤។

បន្ថែមពីជើងហោះហើរមកពីបាងកក អាកាសយានដ្ឋានអន្តរជាតិសៀមរាបអង្គរ ក៏ទទួលបានជើងហោះហើរពីហូជីមិញ ៣ជើងក្នុងមួយថ្ងៃ, ដាណាង ១ជើងក្នុងមួយថ្ងៃ, ហាណូយ ២ជើងក្នុងមួយថ្ងៃ, កូឡាឡាំពួរ ១ជើងក្នុងមួយថ្ងៃ, សិង្ហបុរី ១ជើងក្នុងមួយថ្ងៃ, ភ្នំពេញ ២ជើងក្នុងមួយថ្ងៃ និងក្រុងព្រះសីហនុ ១ជើងក្នុងមួយថ្ងៃ។

នៅថ្ងៃទី៤ កក្កដានេះ មានភ្ញៀវទេសចរជាតិនិងអន្តរជាតិជាច្រើន បានមកទស្សនាថ្ងៃរះនៅប្រាសាទអង្គរ និងតំបន់ជាច្រើនទៀតនៅតំបន់រមណីយដ្ឋានឧទ្យានអង្គរ។ ក្រសួងទេសចរណ៍ បញ្ជាក់ថា ក្នុងមួយថ្ងៃៗ មានភ្ញៀវទិញបណ្ណចូលទស្សនារមណីយដ្ឋានអង្គរប្រមាណ ១,៣០០នាក់ ទៅ ១,៧០០នាក់។ កាលពីពេលថ្មីៗនេះផងដែរ ប្រាសាទអង្គរវត្ត បានស្ថិតនៅលំដាប់លេខ២ ក្លាយជាគោលដៅទេសចរណ៍ទាក់ទាញល្អបំផុតនៅតំបន់អាស៊ី។

សូមជម្រាបថា កម្ពុជា ទទួលបានភ្ញៀវទេសចរទិញបណ្ណចូលទស្សនារមណីយដ្ឋានអង្គរ ប្រាសាទកោះកែ និងកំពង់ផែចុងឃ្លៀសចំនួន ៥២១ ៩៥០នាក់ និងទទួលបានចំណូលជាង ២៤,៣៥លានដុល្លារ ក្នុងរយៈពេល ៦ខែ នៃឆ្នាំ២០២៤ ដោយកើនឡើង ៣៦,២៥% បើធៀបនឹងរយៈពេលដូចគ្នាក្នុងឆ្នាំ២០២៣៕