ភ្នំពេញ៖ ប្រធានសភាពាណិជ្ជកម្មកម្ពុជា អ្នកឧកញ៉ា គិត ម៉េង ជំរុញឱ្យអ្នកវិនិយោគ និងធុរជនកាណាដា ចាប់យកឱកាសវិនិយោគនៅកម្ពុជា ដែលមានទីផ្សារទូលំទូលាយនៅទូទាំងពិភពលោក រួមមាន កាណាដា អាស៊ាន អាសិប ចិន ជប៉ុន កូរ៉េ អេមីរ៉ាត់អារ៉ាប់រួម និងទីផ្សារតាមបណ្តាប្រទេសផ្សេងៗទៀតផងដែរ។

តាមការចុះផ្សាយរបស់សភាពាណិជ្ជកម្ពុជា នាថ្ងៃទី៣០ ខែឧសភា ឆ្នាំ២០២៤ អ្នកឧកញ៉ា គិត ម៉េង បានលើកឡើងថា កាណាដា គឺជាដៃគូពាណិជ្ជកម្ម និងវិនិយោគដ៏ធំបំផុតមួយរបស់កម្ពុជា ដែលក្នុងនោះទំហំពាណិជ្ជកម្មទ្វេភាគីរវាងកាណាដានិងកម្ពុជាក្នុងឆ្នាំ២០២៣ មានប្រមាណជាង ១,៥ពាន់លានដុល្លារ។

ក្នុងជំនួបជាមួយ លោក ម៉ូ ខេវិន ប្រធានការិយាល័យតំណាងសភាពាណិជ្ជកម្មកម្ពុជា នៅទីក្រុងម៉ុងរ៉េអាស់ ខេត្តកេប៊ិច ប្រទេសកាណាដា អ្នកឧកញ៉ា គិត ម៉េង បានបន្តថា ការរួមចំណែករបស់ប្រទេសកាណាដាក្នុងដំណើរសន្តិភាពនៅកម្ពុជា រួមទាំងកិច្ចព្រមព្រៀងទីក្រុងប៉ារីស ជាការជួយគាំទ្រជាបន្តបន្ទាប់ដល់ការអភិវឌ្ឍសេដ្ឋកិច្ចសង្គមកម្ពុជា។ ក្នុងជំនួបដដែល អ្នកឧកញ៉ា គិត ម៉េង បានបញ្ជាក់ថា កម្ពុជា ស្វាគមន៍ជានិច្ចចំពោះការបំពេញបេសកកម្មធុរកិច្ចរបស់កាណាដាមកកាន់កម្ពុជា៕