ភ្នំពេញ៖ ក្រសួង-ស្ថាប័ន សមាគមន៍ វិស័យឯកជន និងសាធារណជនយ៉ាងច្រើនកុះករ បានសរសេរលិខិត សំណេរ និងថតជាវីដេអូបង្ហោះនៅលើបណ្តាញសង្គមជាហូរហែ បាននិងកំពុងក្លាយជាចលនាគាំទ្រគម្រោង«ព្រែកជីកហ្វូណនតេជោ» ក្រោយពីការប្រកាសអំពាវនាវរបស់សម្តេចតេជោ ហ៊ុន សែន ប្រធានព្រឹទ្ធសភា កាលពីថ្ងៃទី២៦ ខែមេសា ឆ្នាំ២០២៤នេះ

ការអំពាវនាវរបស់សម្តេចតេជោអំពីការគាំទ្រគម្រោង«ព្រែកជីកហ្វូណនតេជោ» នេះ ធ្វើឡើងនៅក្នុងពិធីអបអរសាទរសន្និបាតលើកទី១ និងកម្មវិធីពិសាអាហារសាមគ្គីមហាគ្រួសារសមាគមឧកញ៉ាកម្ពុជា កាលពីថ្ងៃទី២៦ ខែមេសា ឆ្នាំ២០២៤។ គម្រោង«ព្រែកជីកហ្វូណនតេជោ» ជាព្រែកជីកប្រវត្តិសាស្ត្ររបស់កម្ពុជា ដែលគ្រោងសាងសង់ឱ្យលេចជារូបរាងនាពេលឆាប់ៗ ខាងមុខនេះ។

សូមជម្រាបផងដែរថា គម្រោង«ព្រែកជីកហ្វូណនតេជោ» មានប្រវែង ១៨០គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។ ផ្លូវទឹកនេះ មានទទឹងមុខកាត់ផ្នែកខាងលើប្រវែង ១០០ម៉ែត្រ, មុខកាត់ផ្នែកខាងក្រោមប្រមាណ ៨០ម៉ែត្រ, ជម្រៅទឹកប្រមាណ ៥,៤ម៉ែត្រ និងមានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នាបានដោយសុវត្ថិភាព។ ការសាងសង់គម្រោងផ្លូវទឹកថ្មី ត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារ និងរយៈពេលសាងសង់ប្រមាណ ៤ឆ្នាំ៕