ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ នាំយកឱកាសការងារប្រមាណជាង ៦ពាន់កន្លែង សម្រាប់បងប្អូនអតីតពលករដែលត្រឡប់មកពីប្រទេសថៃ នៅផ្សារចម្ការតាដោក ស្រុកមង្គលបូរី ខេត្តបន្ទាយមានជ័យ ដែលរៀបចំដោយទីភ្នាក់ងារជាតិមុខរបរ និងការងារ (NEA) រដ្ឋបាលស្រុកមង្គលបូរី សហភាពសហព័ន្ធយុវជនកម្ពុជាខេត្តបន្ទាយមានជ័យ វិស័យឯកជន និងដៃគូពាក់ព័ន្ធផ្សេងទៀត។

ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅថ្ងៃទី២២ ខែវិច្ឆិកា ឆ្នាំ២០២៥នេះ មានសហគ្រាស ក្រុមហ៊ុន រោងចក្រចំនួន២១ បានចូលរួមសម្ភាស និងជ្រើសរើសបុគ្គលិកភ្លាមៗដោយផ្ទាល់ និងមានតម្រូវការកម្លាំងពលកម្មសរុបជាង ៦ ៥០០នាក់។ ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្នុងខេត្តបន្ទាយមានជ័យនេះ អតីតពលករ និងអ្នកចូលរួមទាំងអស់ បានទទួលការដឹកជញ្ជូន អាហារ ភេសជ្ជៈ និងកាហ្វេ ព្រមទាំងទទួលបានការកាត់សក់ពីអ្នកជំនាញដោយឥតគិតថ្លៃថែមទៀតផង។

ឯកឧត្តម ទុយ ស៊ីផាន់ រដ្ឋលេខាធិការក្រសួងការងារ បានមានប្រសាសន៍ថា ការធ្វើការងារក្នុងស្រុក ទទួលបានប្រាក់ឈ្នួលសមរម្យទៅតាមជំនាញ និងមិនមានការបង់ប្រាក់លើបណ្ណការងារនោះឡើយ ហើយក៏មិនមាននគរបាលចុះទៅផាកពិន័យអ្វីដែរ។ លើសពីនេះទៀត ធ្វើការងារក្នុងស្រុក ទទួលបានអត្ថប្រយោជន៍ជាច្រើន ដូចជា មានបណ្ណ ប.ស.ស. ដែលអាចទៅពិនិត្យ និងព្យាបាលជំងឺដោយឥតគិតថ្លៃ ហើយមានប្រាក់សោធននៅពេលធ្វើការងារដល់អាយុ ៦០ឆ្នាំ មានឱកាសជួបជុំក្រុមគ្រួសារបានច្រើន ទាំងនៅក្នុងពិធីបុណ្យទាននានា ក៏ដូចជានៅថ្ងៃឈប់សម្រាកចុងសប្ដាហ៍ ប្រសិនបើធ្វើការជិតផ្ទះអាចត្រឡប់ទៅស្នាក់នៅផ្ទះវិញ ដោយមិនចំណាយលុយលើការជួលផ្ទះ ហើយក៏អាចនៅសល់ពេលធ្វើស្រែចម្ការ ឬការងារអ្វីផ្សេងទៀត៕