ភ្នំពេញ៖ រយៈពេល ២ខែដើមឆ្នាំ២០២៤ កម្ពុជា សម្រេចបានការនាំចេញអង្ករ ៩០ ១៥៣តោន ដែលមានទំហំទឹកប្រាក់ ៦៥,៤៨លានដុល្លារ ទៅកាន់គោលដៅចំនួន៥០ តាមរយៈក្រុមហ៊ុនចំនួន ៤០ក្រុមហ៊ុន។ នេះបើតាមការចុះផ្សាយរបស់សហព័ន្ធស្រូវអង្ករកម្ពុជានាថ្ងៃទី០៩ ខែមីនា ឆ្នាំ២០២៤។  

គោលដៅចំនួន៥០ ដែលកម្ពុជានាំចេញអង្ករនោះ រួមមាន៖ ប្រទេសនៅក្នុងទ្វីបអឺរ៉ុបចំនួន២២ នាំចេញបាន ៥១ ៣៣៣តោន មានទឹកប្រាក់់ ៣៨,៣៧លានដុល្លារ, ប្រទេសជាសមាជិកអាស៊ានមានចំនួន៥ នាំចេញបាន ១៨ ៧៥៣តោន មានទំហំទឹកប្រាក់ ១៣,៣៦លានដុល្លារ, ទៅកាន់ប្រទេសចិន និងតំបន់រដ្ឋបាលស្វយ័តចំនួន ១១ ០៨៣តោន ទទួលបានទឹកប្រាក់ ៦,៨១លានដុល្លារ និងទៅកាន់១៣ ប្រទេសផ្សេងៗទៀតនៅអាហ្វ្រិក មជ្ឈឹមបូព៌ា មានចំនួន ៨ ៩៨៤តោន មានទឹកប្រាក់ ៦,៩០លានដុល្លារ។

សហព័ន្ធស្រូវអង្ករកម្ពុជា បានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ប្រភេទអង្ករដែលកម្ពុជានាំចេញ មានដូចជា៖ អង្ករក្រអូបគ្រប់ប្រភេទមាន ៨៤,៧២%, អង្ករសគ្រាប់វែងមានចំនួន ១១,៥៣%, អង្ករចំហ៊ុយមាន ២,១៧% និងអង្ករសរីរាង្គមាន ១,៧០%។ ទន្ទឹមនឹងនេះ កម្ពុជា ក៏បាននាំចេញស្រូវទៅកាន់ប្រទេសជិតខាងចំនួន ១ ៣៦៨ ៣២២តោន ដែលមានទឹកប្រាក់ ៣៩៥,៧២លានដុល្លារ ក្នុងនោះ ចំនួន ៦៥%ឆ្លងកាត់ការស្នើសុំបញ្ជាក់ឯកសារនាំចេញពីអាជ្ញាធរមានសមត្ថកិច្ច៕