ភ្នំពេញ៖ ក្រសួងរ៉ែ និងថាមពល បានចុះបង្ក្រាបទីតាំងអាជីវកម្មរ៉ែមាសអនាធិបតេយ្យ ដោយប្រើគ្រឿងចក្រ រំសេវជាតិផ្ទុះ សារធាតុគីមី និងជីករូងអណ្ដូងរ៉ែក្រោមដី នៅក្នុងតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី។ សកម្មភាពអាជីវកម្មអនាធិបតេយ្យទាំងនេះ ក្រសួងបានអះអាងថា អាចបង្កឱ្យមានការបាត់បង់ទ្រព្យសម្បត្តិជាតិ ប៉ះពាល់យ៉ាងធ្ងន់ធ្ងរដល់បរិស្ថាន បង្កជាហានិភ័យខ្ពស់ដល់សុខភាព និងសុវត្ថិភាពរបស់អ្នកធ្វើអាជីវកម្មរ៉ែអនាធិបតេយ្យខ្លួនឯងផ្ទាល់ ព្រមទាំងប្រជាពលរដ្ឋនៅក្នុង និងក្រៅមូលដ្ឋានផងដែរ។

បើតាមការចុះផ្សាយរបស់ក្រសួងរ៉ែ និងថាមពល ដែលក្រសួងបានចុះបង្រ្កាបរយៈពេល០៣ថ្ងៃ ចាប់ពីថ្ងៃទី២៨ ខែកុម្ភៈ ដល់ថ្ងៃទី១ ខែមីនា ឆ្នាំ២០២៤នេះ ទីតាំងអាជីវកម្មរ៉ែមាសអនាធិបតេយ្យខាងលើនេះ គឺជាតំបន់អាជីវកម្មរ៉ែមាសបែបលក្ខណៈគ្រួសារតាំងពីអំឡុងឆ្នាំ១៩៨៧ ដែលមានប្រជាពលរដ្ឋប្រកបរបរជីកយក និងរែងមាសដោយដៃ ប៉ុន្តែប៉ុន្មានឆ្នាំចុងក្រោយនេះ បានប្រែទៅជាប្រើគ្រឿងចក្រ រំសេវជាតិផ្ទុះ និងសារធាតុគីមី ដោយមានការជីកត្បូងជាអណ្តូងរ៉ែក្រោមដី។ 

គួរបញ្ជាក់ថា សកម្មភាពអនាធិបតេយ្យបែបនេះ ក្រសួងរ៉ែ និងថាមពល ធ្លាប់បានចុះបង្ក្រាបកាលពីឆ្នាំ២០១៧ និងមានការផ្សព្វផ្សាយជាបន្តបន្ទាប់រួចមកហើយ ប៉ុន្តែសកម្មភាពទាំងអស់នេះ នៅតែកើតមាន ទោះបីជា មន្ទីររ៉ែ និងថាមពលខេត្តមណ្ឌលគិរី បានសហការជាមួយអាជ្ញាធរដែនដីចុះអប់រំ និងទប់ស្កាត់ក៏ដោយ។ ជាក់ស្ដែង សកម្មភាពជីករ៉ែអនាធិបតេយ្យនៅក្នុងតំបន់នេះ នៅតែមានការប្រើប្រាស់សារធាតុគីមី រំសេវជាតិផ្ទុះថ្មបំបែក និងជីករូងអណ្តូងរ៉ែក្រោមដី៕