ភ្នំពេញ៖ រោងចក្រ Minebea Mitsumi នៅខេត្តពោធិ៍សាត់ ត្រៀមនឹងបើកដំណើរការនៅខែតុលាខាងមុខ បន្ថែមលើរោងចក្រ ដែលមានទំហំផ្ទៃដី ២០ហិកតាក្នុងតំបន់សេដ្ឋកិច្ចពិសេសភ្នំពេញ កំពុងដំណើរការយ៉ាងរលូន។ នេះបើតាមការលើកឡើងរបស់ លោក Yoshihisa Kainuma ប្រធានក្រុមប្រឹក្សាភិបាល ក្រុមហ៊ុន Minebea Mitsumi ក្នុងជំនួបជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ក្នុងជំនួបកាលពីថ្ងៃទី១៣ ខែសីហា ឆ្នាំ២០២៥ ឯកឧត្តម ហែម វណ្ណឌី បានកោតសរសើរក្រុមហ៊ុន Minebea ដែលបានរួមចំណែកដ៏សំខាន់ដល់សេដ្ឋកិច្ច និងការបង្កើតការងារនៅកម្ពុជា តាមរយៈភាពជោគជ័យ របស់ក្រុមហ៊ុននៅក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ និងការវិនិយោគថ្មីរបស់ខ្លួននៅក្នុងតំបន់សេដ្ឋកិច្ចពិសេសពោធិ៍សាត់។

ក្នុងគោលដៅធានានូវការផ្គត់ផ្គង់ទឹកស្អាតប្រកបដោយស្តង់ដារគុណភាព ដែលឆ្លើយតបនឹងតម្រូវការរបស់រោងចក្រផលិតគ្រឿងបង្គុំអេឡិចត្រូនិកសកល ដូចជា Minebea ឯកឧត្តម ហែម វណ្ណឌី ក៏បានលើកឡើងពីការវិនិយោគរបស់រាជរដ្ឋាភិបាល ដើម្បីភ្ជាប់បណ្តាញទឹកស្អាតពីបណ្តាញរបស់រដ្ឋាករទឹកពោធិ៍សាត់ ទៅតំបន់សេដ្ឋកិច្ចពិសេសពោធិ៍សាត់ផងដែរ។

ជាមួយគ្នានេះ លោក Kainuma បានអរគុណដល់រាជរដ្ឋាភិបាល និងក្រសួងដែលបានភ្ជាប់សេវាផ្គត់ផ្គង់ទឹកស្អាតសម្រាប់ខ្សែច្រវាក់ផលិតកម្មរបស់រោងចក្រនៅខេត្តពោធិ៍សាត់ ដោយលោកបានបញ្ជាក់ថា៖ «អ្វីៗដំណើរការទៅដោយរលូន ហើយយើងខ្ញុំសូមអរគុណក្រសួង ដែលបានឆ្លើយតបតាមការស្នើសុំរបស់យើងសម្រាប់សេវាផ្គត់ផ្គង់ទឹកស្អាត ដែលធ្វើឱ្យយើងមានទំនុកចិត្តក្នុងការពង្រីកអាជីវកម្មនេះ»៕