ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ អំពាវនាវឱ្យម្ចាស់កន្លែងកែច្នៃបឋមសំបុកត្រចៀកកាំសម្រាប់នាំចេញ និងម្ចាស់ផ្ទះថែរក្សាសត្វត្រចៀកកាំជាលក្ខណៈគ្រួសារ មកដាក់ពាក្យស្នើសុំនៅទីស្តីការក្រសួងកសិកម្ម ដើម្បីនាំចេញសំបុកត្រចៀកកាំ ទៅកាន់ប្រទេសចិន។ នេះបើតាមសេចក្តីជូនដំណឹង របស់ក្រសួងកសិកម្ម កាលពីថ្ងៃទី២៦ ខែឧសភា ឆ្នាំ២០២៥។

ក្រសួងកសិកម្ម បានឱ្យដឹងថា ការនាំចេញសំបុកត្រចៀកកាំពីកម្ពុជាទៅប្រទេសចិននេះ ត្រូវបានចុះហត្ថលេខាដោយក្រសួងកសិកម្ម រុក្ខាប្រមាញ់ និងនេសាទ ជាមួយអគ្គរដ្ឋបាលគយនៃសាធារណរដ្ឋប្រជាមានិតចិន កាលពីថ្ងៃទី១៧ ខែមេសា ឆ្នាំ២០២៥ នៅរាជធានីភ្នំពេញ។

ជាមួយគ្នានេះ បន្ទាប់ពីទទួលបាននូវពាក្យស្នើសុំ អង្គភាពជំនាញ នឹងត្រួតពិនិត្យ និងវាយតម្លៃ ដោយអនុលោម តាមបទដ្ឋានបច្ចេកទេសពាក់ព័ន្ធដូចមានកំណត់ក្នុងពិធីសារ និងសម្របសម្រួលជាមួយភាគីគយចិនដើម្បីនាំចេញ។ ចំពោះ ព័ត៌មានបន្ថែម ពាក់ព័ន្ធនឹងការដាក់ពាក្យស្នើសុំនេះ ម្ចាស់កន្លែងកែច្នៃបឋមសំបុកត្រចៀកកាំសម្រាប់នាំចេញ និងម្ចាស់ផ្ទះថែរក្សាសត្វត្រចៀកកាំជាលក្ខណៈគ្រួសារអាចទំនាក់ទំនងតាមរយៈទូរសព្ទលេខ ០៩៣ ២៦៥៥២៦៕