ភ្នំពេញ៖ សហគមន៍កសិកម្មទំនើប «បន្លែផ្ទះសំណាញ់ត្រាំកក់» ចុះកិច្ចសន្យាផ្គត់ផ្គង់បន្លែសុវត្ថិភាពចំនួន ២២០តោន រយៈពេល ៦ខែ ក្នុងទំហំទឹកប្រាក់ជាង ៣០០លានរៀល ដល់ក្រុមហ៊ុន ហ៊ុយ យន់។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី០៧ ខែមេសា ឆ្នាំ២០២៥។

ការចុះកិច្ចសន្យាផ្គត់ផ្គង់បន្លែនេះ គឺក្រុមហ៊ុននឹងផ្តល់តម្លៃជាមធ្យម ១៥០០រៀលក្នុងមួយគីឡូក្រាម ស្របពេលដែលបន្លែនៅក្រៅសហគមន៍ក្នុងពេលបច្ចុប្បន្ន មានតម្លៃត្រឹមតែ ៣០០រៀលក្នុងមួយគីឡូក្រាម។ ជាមួយនឹងការចុះកិច្ចសន្យាលើកនេះ ផលិតកម្មបន្លែទាំងអស់របស់សហគមន៍ នឹងត្រូវបានធានាទិញដោយទីផ្សារក្នុងតម្លៃកំណត់ច្បាស់លាស់ ដែលអាចការពារសមាជិកសហគមន៍ពីហានិភ័យទីផ្សារ និងផ្តល់ភាពជឿជាក់លើការទទួលបានប្រាក់ចំណេញផងដែរ។

គួរបញ្ជាក់ថា នេះគឺជាលើកទី២ ដែលសហគមន៍កសិកម្មទំនើប «បន្លែផ្ទះសំណាញ់ត្រាំកក់» បានចុះហត្ថលេខាលើការធ្វើផលិតកម្មបន្លែតាមកិច្ចសន្យាក្នុងតម្លៃថេរមួយ បន្ទាប់ពីបានចុះកិច្ចសន្យាផ្គត់ផ្គង់បន្លែសុវត្ថិភាពរយៈពេលមួយឆ្នាំដល់ក្រុមហ៊ុនត្រូភីខេម កាលពីពេលកន្លងទៅ៕