ភ្នំពេញ៖ ក្រសួងប្រៃសណីយ៍ និងទូរគមនាគមន៍ ប្រកាសដាក់ឱ្យប្រើប្រាស់សាកល្បងថ្នាលសេវាសាធារណៈឌីជីថលរួម ហៅថាថ្នាល «DG SuperApp» ដែលមានសមត្ថភាពអាចប្រមូលផ្តុំថ្នាល និងកម្មវិធីឌីជីថល (Mini Apps) សម្រាប់បម្រើសេវាសាធារណៈពហុវិស័យ។ នេះបើតាមសេចក្តីជូនដំណឹង ដែលចេញផ្សាយកាលពី កាលពីថ្ងៃ៣ ខែមេសា ឆ្នាំ២០២៥។

ក្នុងដំណាក់កាលសាកល្បងនេះ ថ្នាល DG SuperApp នឹងមានដាក់បញ្ចូលកម្មវិធីបញ្ញាសិប្បនិម្មិតមួយចំនួន ដើម្បីជួយសម្រួលដល់ការសិក្សា ការស្រាវជ្រាវ ការវិភាគ និងការរស់នៅប្រចាំថ្ងៃរបស់មន្រ្តីរាជការ ធុរជន សិស្ស និស្សិត និងសាធារណជនទូទៅ រួមមាន DG ChatGPT ដែលអាចប្រើប្រាស់ដោយឥតគិតថ្លៃនិងមិនកំណត់ ហើយកម្រិតនៃការឆ្លើយតបប្រហាក់ប្រហែលនឹង ChatGPT ជំនាន់ទី៤ និងកម្មវិធីបកប្រែ TranslateKH ដែលមានសមត្ថភាពបកប្រែអត្ថបទរវាងភាសាខ្មែរ និងភាសាអង់គ្លេស។

ថ្នាល DG SuperApp ក៏បានដាក់បញ្ចូលថ្នាល និងកម្មវិធីរដ្ឋាភិបាលឌីជីថល (DGPs) ជាច្រើន ដូចជា ថ្នាលផ្ទុកឯកសារសាធារណៈផ្លូវការ go.gov.kh, ថ្នាលបង្កើតទម្រង់បែបបទអនឡាញ FormKH, ថ្នាលបង្កើត QR Code, ថ្នាលគ្រប់គ្រង និងតាមដានលំហូរការងាររដ្ឋបាលស្វ័យប្រវត្តិ Flow.gov.kh និងថ្នាលនិងកម្មវិធីជាច្រើនទៀត។ នាពេលខាងមុខ ថ្នាល DG SuperApp នឹងបន្តដាក់បញ្ចូលបន្ថែមនូវកម្មវិធីបញ្ញាសិប្បនិម្មិតសំខាន់ៗបន្ថែមទៀត រួមមាន DG DeepSeek និង DG Gemini ព្រមទាំងថ្នាល និងកម្មវិធីឌីជីថលសំខាន់ៗជាច្រើនបន្តបន្ទាប់ទៀត ដើម្បីបម្រើដល់ការផ្តល់សេវាសាធារណៈផងដែរ។

សាធារណជន អាចទាញយកថ្នាល DG SuperApp មកប្រើប្រាស់សាកល្បង ដោយឥតគិតថ្លៃ តាមរយៈ App Store ឬ Play Store។ សម្រាប់ការចូលរួមមតិយោបល់ ឬព័ត៌មានបន្ថែមពាក់ព័ន្ធនឹងបច្ចេកទេសនៃការប្រើប្រាស់ សាធារណជន អាចទំនាក់ទំនងតាមរយៈអ៊ីមែល [email protected] ឬទូរសព្ទមកលេខ ១២៣ រៀងរាល់ម៉ោងធ្វើការ៕