ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC) សង្ឃឹមថា សមាគមជប៉ុន-កម្ពុជា នឹងជំរុញការផ្សព្វផ្សាយអំពីបច្ចុប្បន្នភាពវឌ្ឍនភាពថ្មីៗ និងបរិយាកាសវិនិយោគរបស់កម្ពុជាទៅសហគមន៍ធុរកិច្ចប្រទេសជប៉ុន ដើម្បីជំរុញកំណើនការបោះទុនវិនិយោគដោយផ្ទាល់ពីជប៉ុននៅកម្ពុជា។

ក្នុងជំនួបជាមួយឯកឧត្តម TAKAHASHI Fumiaki ប្រធានសមាគមជប៉ុន-កម្ពុជា កាលពីថ្ងៃទី០២ ខែមេសា ឆ្នាំ២០២៥ ឯកឧត្តម ស៊ុន ចាន់ថុល ក៏បានអរគុណចំពោះរដ្ឋាភិបាល និងប្រជាជនជប៉ុន ដែលតែងតែផ្តល់នូវជំនួយគាំទ្រកម្ពុជាក្នុងគ្រប់រូបភាព ទាំងផ្នែករឹង និងផ្នែកទន់ផងដែរ។

ជាមួយគ្នានេះ ឯកឧត្តម TAKAHASHI Fumiaki បានលើកឡើងពីភាពរីកចម្រើនថ្មីៗ ដែលគួរជាទីកោតសរសើរចំពោះកិច្ចខិតខំប្រឹងប្រែងរបស់ប្រមុខដឹកនាំ និងអ្នកពាក់ព័ន្ធគ្រប់វិស័យនៅកម្ពុជាផងដែរ។ ទន្ទឹមនឹងនេះ អ្នកតំណាងក្រុមហ៊ុនជប៉ុនដែលមានវត្តមានជាមួយឯកឧត្តមប្រធានសមាគម ក៏បានធ្វើបទបង្ហាញអំពីក្រុមហ៊ុនរបស់ខ្លួន ដោយលើកយកជំនាញឯកទេស, ព័ត៌មានផលិតផល, និងបច្ចេកវិទ្យាថ្មីៗ៕