ភ្នំពេញ៖ ផែនទីបង្ហាញផ្លូវអភិវឌ្ឍន៍ជំនាញឌីជីថលនៅកម្ពុជា ២០២៤-២០៣៥ ប្រាប់ពីយុទ្ធសាស្រ្តដើម្បីទាក់ទាញសិស្សឆ្នើមឱ្យចាប់យកការសិក្សាជំនាញឌីជីថល ដោយក្នុងនោះត្រូវដាក់ចេញសកម្មភាពអាទិភាពចំនួន៣ ចំណុចដូចខាងក្រោម៖

ទី១, តម្រង់ទិសសិក្សាសម្រាប់សិស្សនៅកម្រិតមធ្យមសិក្សាឱ្យយល់ដឹង និងចាប់អារម្មណ៍លើជំនាញឌីជីថល តាមរយៈការជំរុញការអប់រំក្នុងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ការរៀបចំព្រឹត្តិការណ៍ពិព័រណ៍បច្ចេកវិទ្យា និងការប្រកួតប្រជែងវិទ្យាសាស្ត្រ។

ទី២, ជំរុញ និងបង្កើនការផ្តល់អាហារូបករណ៍សម្រាប់សិក្សាជំនាញឌីជីថល ដើម្បីផ្តល់ឱ្យសិស្សដែលមានទេពកោសល្យ និងមានបំណងចង់បន្តការសិក្សាជំនាញឌីជីថល ដោយផ្អែកលើកត្តាសមត្ថភាព ស្ថានភាពជីវភាពគ្រួសារ ឬរស់នៅជនបទ និងតំបន់ដាច់ស្រយាល។

និងទី៣, រៀបចំកម្មវិធីផ្តល់ជំនួយហិរញ្ញវត្ថុសម្រាប់ការសិក្សា ដែលមានលក្ខណៈអនុគ្រោះ តាមរយៈការរៀបចំ សម្របសម្រួលនីតិវិធីក្នុងការទទួលបានជំនួយហិរញ្ញវត្ថុសម្រាប់សិស្ស ដែលមានបំណងបន្តការ សិក្សាជំនាញឌីជីថល ដោយសហការជាមួយនឹងស្ថាប័នហិរញ្ញវត្ថុ ដៃគូអភិវឌ្ឍន៍ ដើម្បីឱ្យសិស្សអាច ទទួលជំនួយហិរញ្ញវត្ថុបន្តការសិក្សា។

ប្រភពពីសៀវភៅ «ផែនទីបង្ហាញផ្លូវអភិវឌ្ឍន៍ជំនាញឌីជីថលនៅកម្ពុជា ២០២៤-២០៣៥»៖ https://www.smenews.asia/doc?id=18