ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ជឿជាក់ថា រោងចក្រកែច្នៃឈើដាំក្នុងស្រុកពីដើមអាកាស្យា និងដើមប្រេងខ្យល់ របស់ក្រុមហ៊ុន TNTVN Forestry Co.,Ltd ដែលស្ថិតនៅខេត្តព្រះសីហនុ នឹងរួមចំណែកលើកកម្ពស់ការផ្ទេរបច្ចេកវិទ្យា និងការពង្រឹងសមត្ថភាពឧស្សាហកម្មកម្ពុជា។

ក្នុងពិធីសម្ពោធបើកឱ្យដំណើរការរោងចក្រកែច្នៃឈើដាំនេះផងដែរ ឯកឧត្តម ជា វុទ្ធី ក៏រំពឹងថា រោងចក្រនេះ នឹងនាំផ្តល់អត្ថប្រយោជន៍ដល់សេដ្ឋកិច្ច រួមចំណែកបង្កើតការងារ និងបណ្តុះបណ្តាលជំនាញសម្រាប់ប្រជាពលរដ្ឋកម្ពុជា។ ឯកឧត្តម ជា វុទ្ធី ជំរុញឱ្យក្រុមហ៊ុនខាងលើ ពង្រីកការវិនិយោគបន្ថែមទៀតជាបន្តបន្ទាប់ ពិសេសវិនិយោគលើដំណាំឈើដាំក្នុងស្រុក ដើម្បីផ្គត់ផ្គង់តម្រូវការផលិតកម្មរបស់ក្រុមហ៊ុន និងអាចយកទៅកែច្នៃធ្វើគ្រឿងសង្ហារឹម ខណៈដែលកម្ទេចកម្ទីសំណល់ឈើអាចយកទៅប្រើប្រាស់ជាថាមពលកកើតឡើងវិញ ហើយដំណាំឈើដាំនេះក៏អាចទទួលបានអត្ថប្រយោជន៍ពីឥណទានកាបូនផងដែរ។

ឯកឧត្តមអគ្គលេខាធិការគណៈកម្មាធិការវិនិយោគកម្ពុជា ក៏បានបន្តលើកឡើងពីបរិស្ថានវិនិយោគ, ឧត្តមភាព និងធនធានធម្មជាតិដ៏សម្បូរបែប, កម្លាំងពលកម្មវ័យក្មេងដែលមានជំនាញក្នុងវិស័យឧស្សាហកម្ម និងផលិតកម្ម, តម្លៃពលកម្មដែលមានភាពប្រកួតប្រជែងខ្ពស់ និងការបន្តកសាងហេដ្ឋារចនាសម្ព័ន្ធសម្រាប់ការដឹកជញ្ជូន ដែលកត្តាទាំងនេះ ធ្វើឱ្យកម្ពុជា ក្លាយជាគោលដៅដ៏ទាក់ទាញសម្រាប់ការបណ្តាក់ទុនវិនិយោគ។

គួរបញ្ជាក់ថា កំណើននៃការវិនិយោគ ក្នុងរយៈពេល១១ខែ នៃឆ្នាំ២០២៤ កើនឡើងប្រមាណ៤០% បើធៀបនឹងរយៈពេលដូចគ្នា ក្នុងឆ្នាំ២០២៣។ ជាមួយគ្នានេះ ចាប់ពីខែមករា ដល់ខែវិច្ឆិកា ឆ្នាំ២០២៤ ការវិនិយោគរបស់វៀតណាម ជាប់ចំណាត់ថ្នាក់ទី៣ ក្នុងទំហំទុនវិនិយោគប្រមាណ ៥៥៧លានដុល្លារ។ នេះបើតាមការចុះផ្សាយរបស់ក្រុមប្រឹក្សាកម្ពុជា នាថ្ងៃទី៥ ខែធ្នូ ឆ្នាំ២០២៤៕