ភ្នំពេញ៖ ក្រុមហ៊ុន ZhongJiao Tongli មានបំណងពង្រីកការវិនិយោគលើវិស័យកសិកម្ម ក្នុងខេត្តរតនគិរី និងខេត្តមណ្ឌលគិរី បន្ថែមពីលើសកម្មភាពវិនិយោគបច្ចុប្បន្ន ដែលមាន ដូចជាដំណាំចេក និងស្វាយ នៅតាមបណ្ដាខេត្តមួយចំនួន មានខេត្តរតនគិរី ខេត្តមណ្ឌលគិរី និងខេត្តស្ទឹងត្រែង។ នេះជាការលើកឡើងរបស់លោក Zhongdi Sun ប្រធានក្រុមហ៊ុន ZhongJiao Tongli ប្រាប់ទៅសម្តេចធិបតី ហ៊ុន ម៉ាណែត កាលពីថ្ងៃទី៦ ខែវិច្ឆិកា ឆ្នាំ២០២៤។

លោក Zhongdi Sun បានលើកឡើងពីមូលហេតុដែលលោកបោះទុនវិនិយោគនៅកម្ពុជា ថា កម្ពុជាគឺជាប្រទេសមានសុខសន្តិភាព ស្ថិរភាពនយោបាយ ដែលការណ៍នេះជាកាលានុវត្តភាព និងកត្តាអំណោយផលសម្រាប់ការវិនិយោគ។ សម្តេចធិបតីនាយករដ្ឋមន្រ្តី បានលើកឡើងពីផ្ដល់អាទិភាពទៅលើវិស័យកសិកម្ម និងគោលនយោបាយលើកទឹកចិត្តការវិនិយោគនៅខេត្តភាគឦសាន ដោយផ្អែកតាមគោលនយោបាយនេះ ក្រុមហ៊ុនអាចពិនិត្យលទ្ធភាពវិនិយោគលើវិស័យផ្សេងៗទៀតនៅតំបន់នោះផងដែរ។

ពាក់ព័ន្ធនឹងលទ្ធភាពនៃការពង្រីកការវិនិយោគរបស់ក្រុមហ៊ុននៅកម្ពុជា សម្ដេចធិបតី ហ៊ុន ម៉ាណែត ក៏បានជំរុញឱ្យក្រុមហ៊ុន ZhongJiao Tongli បន្តសហការ និងពិភាក្សាជាមួយក្រសួងកសិកម្ម រុក្ខាប្រមាញ់ និងនេសាទ និងក្រុមប្រឹក្សាអភិវឌ្ឍន៍កម្ពុជា។ គួរបញ្ជាក់ថា ក្រុមហ៊ុន Zhongjiao Tongli មានមូលដ្ឋាននៅក្រុងស៊ីអាន (Xi'an) និងមានប្រតិបត្តិការអាជីវកម្មលើវិស័យពាណិជ្ជកម្ម កសិកម្ម ថាលពលស្អាត និងប្រព័ន្ធដឹកជញ្ជូនឆ្លាតវៃ៕