ភ្នំពេញ៖ រដ្ឋបាលខេត្តកំពង់ស្ពឺ នឹងរៀបចំកម្មវិធីប្រណាំងទូកនៅដងស្ទឹកព្រែកត្នោត នាទីរួមខេត្តរយៈពេល២ថ្ងៃ ចាប់ពីថ្ងៃទី១៨-១៩ ខែវិច្ឆិកា ឆ្នាំ២០២៣នេះ ដើម្បីចូលរួមអបអរសាទរព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ព្រមទាំងជំរុញចរាចរសេដ្ឋកិច្ចរបស់ប្រជាពលរដ្ឋ ឱ្យមានការរីកចម្រើនផងដែរ។

រដ្ឋបាលខេត្តបានប្រាប់ដល់ស្ថាប័ន-អង្គភាពពាក់ព័ន្ធនានារបស់ខេត្ត និងគ្រឹះស្ថានឯកជន ដែលមានបំណងចូលរួមប្រណាំងទូក នៅក្នុងខេត្តកំពង់ស្ពឺ ដាក់ពាក្យចូលរួមប្រកួតនៅគណៈកម្មការខេត្តកំពង់ស្ពឺ ឱ្យបានទាន់ពេលវេល។ ការរៀបចំឱ្យមានពិធីប្រណាំងទូកនៅទីរួមខេត្តនាឆ្នាំនេះ ក៏មានការសម្ដែងសិល្បៈ ទស្សនីយភាពផ្សេងៗ ព្រមទាំងមានការបាញ់កាំជ្រួចនាពេលរាត្រី សម្រាប់សាធារណជនចូលរួមកម្សាន្តលេងសប្បាយផងដែរ៕