ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉េ (KOICA), CrePASS និង PPCBank នឹងសហការរៀបចំសិក្ខាសាលាហិរញ្ញវត្ថុ នៅថ្ងៃទី២២ ខែសីហា ឆ្នាំ២០២៤។ សិក្ខាសាលានេះ រៀបចំឡើងក្នុងគោលបំណងកសាងសមត្ថភាពហិរញ្ញវត្ថុ រួមទាំងផ្តល់ចំណេះដឹងគ្រប់គ្រងហិរញ្ញវត្ថុដ៏មានប្រសិទ្ធភាពដល់សិស្ស និស្សិត និងសាធារណជន។

សិក្ខាសាលាហិរញ្ញវត្ថុនេះ នឹងធ្វើឡើងនៅក្នុងសាកលវិទ្យាល័យភូមិន្ទភ្នំពេញ (CKCC Seminar Room Type B) វេលាម៉ោង ២រសៀល និងអ្នកចូលរួមត្រូវបានកំណត់ចំនួន ១៣០នាក់។ វគ្គសិក្សា នឹងបង្ហាញពីនិយមន័យហិរញ្ញវត្ថុ, មូលហេតុគ្រប់គ្រងហិរញ្ញវត្ថុ, យុទ្ធសាស្រ្តចាត់ចែងហិរញ្ញវត្ថុ, និយមន័យឥណទាន និងបំណុល, មូលហេតុគ្រប់គ្រងឥណទាន និងរបៀបគ្រប់គ្រងឥណទាន និងបំណុល។ ចំពោះសាធារណជន ដែលមានបំណងចូលរួមក្នុងសិក្ខាសាលាខាងលើនេះ អាចចុះឈ្មោះតាមរយៈតំណភ្ជាប់ https://bit.ly/CrePASSCambodiaFinancialEducation_koica។

ចំណេះដឹងផ្នែកហិរញ្ញវត្ថុ គឺមានសារសំខាន់ណាស់ក្នុងជីវិតប្រចាំថ្ងៃរបស់មនុស្សម្នាក់ៗ។ ដូច្នេះ ប្រសិនបើបុគ្គលណាម្នាក់មានចំណេះដឹងផ្នែកហិរញ្ញវត្ថុមិនគ្រប់គ្រាន់ទេ បុគ្គលនោះនឹងលំបាកក្នុងការគ្រប់គ្រងប្រាក់ឱ្យមានប្រសិទ្ធភាព និងអាចប្រឈមមុខនឹងការលំបាកនៅក្នុងប្រតិបត្តិការនៅធនាគារ និងមិនអាចយល់ពីការពន្យល់របស់បុគ្គលិកធនាគារបានទេ។ នេះបើតាមការចុះផ្សាយរបស់ PPCBank កាលពីថ្ងៃទី៨ ខែសីហា ឆ្នាំ២០២៤៕