ភ្នំពេញ៖ ចុងស្លាបមាន់ និងផលិតផលគ្រឿងក្នុងជ្រូកបង្កក ដែលនាំចូលពីប្រទេសហូឡង់ និងប្រទេសចិនចំនួន៣ ១៩៥គីឡូក្រាម ត្រូវបានមន្ត្រីគយតំបន់១ នៃអគ្គនាយកដ្នានគយ និងរដ្ឋាករកម្ពុជា សហការជាមួយមន្រ្តីរបស់អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំសាខារាជធានីភ្នំពេញ ដុតកម្ទេចចោល កាលពីរសៀលថ្ងៃទី១៨ ខែកក្តដា ឆ្នាំ២០២៤។

មន្រ្តីជំនាញសាខា ក.ប.ប. រាជធានីភ្នំពេញ បានបញ្ជាក់ថា ផលិតផលគ្រឿងក្នុងជ្រូក និងបំណែកសាច់មាន់បង្កក ដែលដុតចោលជាង ៣តោន នៅទីលានចាក់សំរាមក្នុងខណ្ឌដង្កោរាជធានីភ្នំពេញ នេះ ជាទំនិញល្មើសពីសេចក្តីជូនដំណឹងស្តីពីការផ្អាកជាបណ្តោះអាសន្នលើការនាំចូលគ្រឿងក្នុង និងសាច់បង្កក។

តាមការចុះផ្សាយរបស់ ក.ប.ប. នាថ្ងៃទី១៩ កក្កដា បានឱ្យដឹងថា ក្រោយពន្យល់ណែនាំអំពីនីតិវិធី ម្ចាស់ទំនិញបានឯកភាពឱ្យដុតកម្ទេចចោលនូវផលិតផលសាច់បង្កកនិងគ្រឿងក្នុងជ្រូក រួមមាន៖ ចុងស្លាបមាន់ សរុប ២ ១៩០គីឡូក្រាម និងពោះវៀនជ្រូក ដែលមានទម្ងន់សរុប ១ ០០៥គីឡូក្រាម៕