ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ គ្រោងចុះអនុស្សរណៈនៃការយោគយល់គ្នា (MoU) ស្តីពី កិច្ចសហប្រតិបត្តិការវិស័យកសិកម្មកម្ពុជា-ចិន ជាមួយបណ្ឌិត្យសភាវិទ្យាសាស្ត្រសង្គមផ្លូវសូត្រខេត្តហៃណាន នៃប្រទេសចិន នាពេលខាងមុខ។

ក្នុងជំនួបនាថ្ងៃទី២៧ ខែឧសភា ឆ្នាំ២០២៦ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម បានស្នើឱ្យភាគីចិនបន្ទាប់ពីបានចុះហត្ថលេខា MoU រួច ស្នើឱ្យបង្កើតជាគម្រោងកិច្ចសហប្រតិបត្តិការលើវិស័យកសិកម្ម និងជួយកៀរគរអ្នកវិនិយោគចិនបន្ថែមទៀតមកវិនិយោគនៅកម្ពុជាលើការកែច្នៃកសិផល ការកសាងហេដ្ឋារចនាសម្ព័ន្ធដឹកជញ្ជូន រួមមាន ឃ្លាំងសម្ងួត ឃ្លាំងស្តុកផលិតផលត្រជាក់ ការវិនិយោគលើកំពង់ផែសម្រាប់ដឹកជញ្ជូនផលិតផលកសិកម្ម និងហេដ្ឋារចនាសម្ព័ន្ធសម្រាប់សម្របសម្រួលការនាំចេញផលិតផលកសិកម្ម។

ជាមួយគ្នានេះ លោក Qiu Wenxu អនុប្រធាននាយកប្រតិបត្តិបណ្ឌិត្យសភាវិទ្យាសាស្ត្រសង្គមផ្លូវសូត្រខេត្តហៃណាន ទទួលយកសំណើរបស់ឯកឧត្តមអនុរដ្ឋលេខាធិការ ដើម្បីផ្សព្វផ្សាយពីគោលនយោបាយលើកទឹកចិត្តពិសេស របស់រាជរដ្ឋាភិបាលកម្ពុជាដល់វិនិយោគិនចិនឱ្យមកធ្វើការវិនិយោគឱ្យបានច្រើននៅកម្ពុជា៕