ភ្នំពេញ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម លើកទឹកចិត្តក្រុមហ៊ុន VISA Cambodia ឱ្យបន្តកិច្ចសហប្រតិបត្តិការជាមួយក្រសួងពាណិជ្ជកម្មបន្ថែមទៀត ដើម្បីរួមចំណែកលើកកម្ពស់ពាណិជ្ជកម្មតាមប្រព័ន្ធអេទ្បិចត្រូនិក និងការជំរុញការចូលរួមរបស់សហគ្រាសមីក្រូ តូច និងមធ្យម (MSMEs) ក្នុងពាណិជ្ជកម្មអន្តរជាតិ និងការចូលរួមព្រឹត្តិការណ៍ពិព័រណ៍ពាណិជ្ជកម្មនានា ដែលក្រសួងពាណិជ្ជកម្មចូលរួមនិងរៀបចំជាដើម។

ក្នុងជំនួបជាមួយលោកជំទាវ ចម និម្មល នេះ លោកស្រី Lisa Sargent នាយិកាគ្រប់គ្រងក្រុមហ៊ុន VISAបានបញ្ជាក់អំពីវឌ្ឍនភាពការងារ និងទិសដៅអាទិភាពនានារបស់ VISA Cambodia ក្នុងការបន្តកិច្ចសហប្រតិបត្តិការលើកកម្ពស់សកម្មភាពពាណិជ្ជកម្ម ជាពិសេសសម្រាប់សហគ្រាសមីក្រូ តូច និងមធ្យម។

លោកជំទាវ ចម និម្មល ក៏បានកត់សម្គាល់លើការចូលរួមចំណែករបស់ VISA Cambodia តាមរយៈកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ក្នុងការលើកស្ទួយសហគ្រិនភាពស្រ្តី សហគ្រិនភាពវ័យក្មេង និងអក្ខរកម្មឌីជីថលនិងហិរញ្ញវត្ថុ៕