ភ្នំពេញ៖ ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ ឱ្យអ្នកជាប់ពន្ធរួសរាន់ដាក់ពាក្យស្នើសុំអត្ថប្រយោជន៍ក្រោមកិច្ចព្រមព្រៀង DTA និងត្រូវអនុវត្តតាមច្បាប់និងបទបញ្ញត្តិនានាស្តីពីពន្ធដារជាធរមាន មុនពេលទទួលបានការអនុញ្ញាតពីអគ្គនាយកដ្ឋានពន្ធដារ។

អត្ថប្រយោជន៍ក្រោមកិច្ចព្រមព្រៀង DTA នេះ នឹងត្រូវអនុវត្តសម្រាប់រយៈពេលមួយឆ្នាំពេញ សម្រាប់គ្រប់ករណីស្នើសុំដែលទទួលបានការអនុញ្ញាតពីអគ្គនាយកដ្ឋានពន្ធដារ ដោយគិតចាប់ពីថ្ងៃទី០១ ខែមករា នៃឆ្នាំជាប់ពន្ធចរន្ត។ នេះបើតាមសេចក្តីណែនាំស្តីពីការផ្តល់អត្ថប្រយោជន៍ក្រោមកិច្ចព្រមព្រៀងស្តីពី«ការចៀសវាងការយកពន្ធត្រួតគ្នា (Double Taxation Agreement-DTA)» ដែលចុះហត្ថលេខាដោយឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ នៅថ្ងៃទី០៣ ខែមករា ឆ្នាំ២០២៤នេះ។

ការណែនាំនេះ ដើម្បីផ្តល់នូវការលើកទឹកចិត្តនិងភាពងាយស្រួលបន្ថែមទៀតដល់អ្នកជាប់ពន្ធ ក្នុងាការអនុវត្តនិងទទួលបានអត្ថប្រយោជន៍ក្រោមកិច្ចព្រមព្រៀង DTA របស់អគ្គនាយកដ្ឋានពន្ធដារ។ កន្លងមក អគ្គនាយកដ្ឋានពន្ធដារ ក៏សង្កេតឃើញផងដែរថា និវាសនជននៃយុត្តាធិការដៃគូកិច្ចព្រមព្រៀង DTA របស់កម្ពុជា, អភិបាល, បណ្ណាធិការ ឬកម្មសិទ្ធិករសហគ្រាសពាក់ព័ន្ធ ដែលហៅកាត់ថា«អ្នកជាប់ពន្ធ» បានផ្តល់កិច្ចសហការអនុវត្តបានល្អរួចមកហើយតាមច្បាប់និងបទប្បញ្ញត្តិនានាស្តីពីពន្ធដារ និងសេចក្តីណែនាំទាក់ទងនឹង DTA ក៏ដូចជាការដាក់ឱ្យអនុវត្តប្រព័ន្ធគ្រប់គ្រងស្នើសុំ DTA តាមអនឡាញ៕