ភ្នំពេញ៖ និយ័តករធានារ៉ាប់រងកម្ពុជា និងនាយកដ្ឋានត្រួតពិនិត្យសហគ្រាសគ្រប់គ្រងដោយរដ្ឋ និងធានារ៉ាប់រង នៃក្រសួងហិរញ្ញវត្ថុឡាវ បានចុះអនុស្សរណៈ (MOU) លើការរៀបចំច្បាប់ និងបទប្បញ្ញត្តិពាក់ព័ន្ធគ្រប់គ្រងវិស័យធានារ៉ាប់រង រួមទាំងចែករំលែកបទពិសោធក្នុងការបង្កើតក្រុមហ៊ុនធានារ៉ាប់រងបន្តនៅក្នុងស្រុក។ នេះបើតាមការចុះផ្សាយរបស់និយ័តករធានារ៉ាប់រងកម្ពុជា(ន.ធ.ក.) កាលពីថ្ងៃទី០៤ ខែកុម្ភៈ ឆ្នាំ២០២៥។

ការចុះ MOU ដែលចុះហត្ថលេខាដោយឯកឧត្តម ប៊ូ ច័ន្ទភីរូ អគ្គនាយក នៃន.ធ.ក. និងលោក Phaitoun Thienglamay តំណាងឱ្យនាយកដ្ឋានត្រួតពិនិត្យសហគ្រាសគ្រប់គ្រងប្រទេសឡាវនេះ ដើម្បីធានាបាននូវប្រសិទ្ធភាព យុត្តិធម៌ សុវត្ថិភាព និងស្ថិរភាពនៃទីផ្សារធានារ៉ាប់រងទាំងក្នុងប្រទេសឡាវ និងកម្ពុជា ក្នុងក្របខ័ណ្ឌចំនួន៤។

ក្របខ័ណ្ឌចំនួន ៤នោះ រួមមាន៖ ១. គាំទ្រទៅវិញទៅមក តាមរយៈការផ្ដល់ជំនួយលើការកសាងសមត្ថភាព និងការផ្លាស់ប្ដូរបទពិសោធ, ២. សហការផ្លាស់ប្តូរព័ត៌មានក្នុងការរៀបចំបទប្បញ្ញត្តិលើការគ្រប់គ្រង និងដាក់ចេញផលិតផលធានារ៉ាប់រង ដូចជា៖ ផលិតផលធានារ៉ាប់រងខ្នាតតូច, ផលិតផលដែលលក់តាមបែបឌីជីថល និងផលិតផលធានារ៉ាប់រងថ្មីៗ។ ចំពោះ ៣. សហការផ្ដល់ជំនួយ និងផ្លាស់ប្ដូរបទពិសោធក្នុងការអនុវត្តបរិសា្ថនសាកល្បង (Sandbox), ៤. ចែករំលែកបទពិសោធក្នុងយន្តការនៃការប្រឆាំងការសម្អាតប្រាក់ និងអនុវត្តការត្រួតពិនិត្យធានារ៉ាប់រង និង ៥.សហការចែករំលែកបទពិសោធ និងឧត្តមានុវត្តន៍ពាក់ព័ន្ធនឹងហិរញ្ញប្បទានហានិភ័យ គ្រោះមហន្តរាយ៕