ភ្នំពេញ៖ ចាប់ពីឆ្នាំ២០២៥ តទៅ យន្តការនៃការកំណត់ LPI នឹងត្រូវផ្លាស់ប្តូរថ្មី ដោយមិនមានការស្ទង់មតិ និងការកំណត់ចំណាត់ថ្នាក់បន្តទៀតឡើយ។ ការផ្លាស់ប្តូរបែបនេះ គឺដើម្បីបង្កើនប្រសិទ្ធភាពកំណត់ចំណុចខ្លាំង និងចំណុចខ្សោយ នៃខ្សែចង្វាក់ផ្គត់ផ្គង់ក្នុងវិស័យភស្តុភារកម្ម និងកំណត់គោលដៅអភិវឌ្ឍន៍ឱ្យបានច្បាស់លាស់ផងដែរ។

ក្នុងប្រជុំពិនិត្យលើបទបង្ហាញស្តីពី វិធីសាស្រ្ត និងនីតិវិធីក្នុងការប្រមូលទិន្នន័យចំពោះ «សន្ទស្សន៍ប្រតិបត្តិការភស្តុភារកម្ម (Logistic Performance Index - LPI)» ជាមួយលោកស្រី Tania Meyer នាយិកាគ្រប់គ្រងធនាគារពិភពលោក ប្រចាំកម្ពុជា ឯកឧត្តម ស៊ុន ចាន់ថុល ប្រធានក្រុមប្រឹក្សាជាតិភស្តុភារកម្ម ស្នើតួអង្គពាក់ព័ន្ធទាំងអស់ បន្តកិច្ចសហការ និងស្នើសុំការគាំទ្រពីធនាគារពិភពលោក ជុំវិញការធ្វើឱ្យប្រសើរឡើងក្នុងវិស័យភស្តុភារកម្មនៅកម្ពុជា។

ក្នុងកិច្ចពិភាក្សា ដែលធ្វើឡើង កាលថ្ងៃទី០៤ ខែកុម្ភៈ ឆ្នាំ២០២៥ នេះ លោកស្រី Tania Meyer ក៏បានតាំងចិត្តខ្ពស់ ក្នុងការចូលរួមជាមួយរាជរដ្ឋាភិបាល ដើម្បីជំរុញឱ្យកម្ពុជាក្លាយទៅជាមជ្ឈមណ្ឌលភស្តុភារកម្មមួយ ដែលពោរពេញដោយសក្តានុពល និងប្រកបដោយភាពប្រកួតប្រជែងខ្ពស់នៅក្នុងតំបន់។ បើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា (CDC) នាថ្ងៃទី០៥ ខែកុម្ភៈ ឆ្នាំ២០២៥ វិធីសាស្រ្ត និងនីតិវិធីក្នុងការប្រមូលទិន្នន័យដើម្បីកំណត់ LPI ខាងលើនេះ ត្រូវបានរៀបចំចងក្រងដោយអ្នកជំនាញរបស់ធនាគារពិភពលោក៕