ភ្នំពេញ៖ អគ្គនាយកដ្ឋានពន្ធដារ នឹងចុះធ្វើសវនកម្មដល់ទីកន្លែងសហគ្រាសចំនួន៣០០៦ ក្នុងឆ្នាំ២០២៤នេះ។ នេះបើតាមសេចក្តីជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី០៩ ខែកក្ដដានេះ ដោយផ្អែកតាមច្បាប់ស្តីពីសារពើពន្ធ និងប្រកាសស្តីពីសវនកម្មពន្ធដារ និងសៀវភៅណែនាំស្តីពីបែបបទ និងនីតិវិធីនៃការធ្វើសវនកម្មពន្ធដារ សម្រាប់មន្ត្រីពន្ធដារនិងអ្នកជាប់ពន្ធ។

លិខិតជូនដំណឹងស្តីពី«ការអនុវត្តកម្មវិធីសវនកម្មពន្ធដារឆ្នាំ២០២៤»នេះ អគ្គនាយកដ្ឋានពន្ធដារ នឹងផ្ញើដល់សហគ្រាសនីមួយៗដើម្បីត្រៀមខ្លួនក្នុងការផ្តល់កិច្ចសហការជាមួយនឹងរដ្ឋបាលសារពើពន្ធ។ អគ្គនាយកដ្ឋានពន្ធដារ បានគូសបញ្ជាក់ប្រាប់អ្នកជាប់បន្ធបន្ថែមថា សហគ្រាសអាចត្រូវចុះធ្វើសវនកម្មដល់ទីកន្លែងតែម្តងក្នុងរង្វង់៣ឆ្នាំ លើកលែងតែករណីដែលអគ្គនាយកដ្ឋានពន្ធដារ រកឃើញថា មានហានិភ័យឬភាពមិនប្រក្រតីណាមួយ។

ជាមួយគ្នានេះ សហគ្រាសក៏អាចស្នើសុំមកអគ្គនាយកដ្ឋានពន្ធដារ ក្នុងករណីដែលសហគ្រាសមានបំណងឱ្យមានការចុះធ្វើសវនកម្មពន្ធដារ ដើម្បីត្រួតពិនិត្យការបំពេញកាតព្វកិច្ចសារពើពន្ធរបស់ខ្លួនក្នុងរង្វង់៣ឆ្នាំនេះផងដែរ៕