ភ្នំពេញ៖ កម្ពុជា សម្រេចបានការនាំចេញផលិតផលជលផលចំនួន ៣៨តោន ទៅកាន់ទីផ្សារប្រទេសចិន ក្នុងរយៈពេល ៥ខែ ដើមឆ្នាំ២០២៤ ខណៈពេញមួយឆ្នាំ២០២៣ កម្ពុជា បាននាំចេញផលិតផលជលផលចំនួន ៥០តោនទៅកាន់ប្រទេសចិន។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

ជលផលចំនួន ៣៨តោន ដែលកម្ពុជាបាននាំចេញទៅចិន បន្ទាប់ពីភាគីកម្ពុជា-ចិនបានចុះកិច្ចព្រមព្រៀងពាណិជ្ជកម្មសេរី កាលពីឆ្នាំ២០២០នេះ រួមមានកំពិសបង្កកចំនួន ៣៥,៨០តោន អន្ទង់រស់ ០,២តោន និងបង្កងប៉ាករស់ចំនួន២,៣តោន។ ចំណែកក្នុងមួយឆ្នាំ២០២៣ កន្លងទៅ កម្ពុជាសម្រេចបានការនាំចេញកំពិសបង្កកចំនួន ៤៧តោន អន្ទង់បង្កក ២តោន និងបង្កងប៉ាករស់ ១តោន ទៅចិន។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម បានលើកឡើងក្នុងទិវាមច្ឆជាតិ លើកទី១៩ នាថ្ងៃទី១ ខែកក្កដា ឆ្នាំ២០២៤ ថា ការសម្រេចបាននាំចេញផលិតផលជលផលទៅកាន់ទីផ្សារអន្តរជាតិនេះ គឺជាលទ្ធផលនៃកិច្ចសហការយ៉ាងជិតស្និទ្ធជាមួយដៃគូអភិវឌ្ឍន៍នានាលើការពង្រឹងគុណភាព សុវត្ថិភាព និងការកែច្នៃផលិតផល ជលផលកម្ពុជាសម្រាប់ទីផ្សារក្នុងស្រុក និងក្រៅស្រុក៕