ភ្នំពេញ៖ គ្រាប់ពូជពោតនិមិត្តសញ្ញា Sun smile 99999 ចំនួន ៧៧១ការ៉ុង ដោយក្នុងមួយការ៉ុងទំងន់១០គីឡូក្រាម ត្រូវបានស្នងការដ្ឋាននគរបាលខេត្តបាត់ដំបង កម្លាំងការិយាល័យនគរបាលប្រឆាំងបទ ល្មើសសេដ្ឋកិច្ច នៃស្នងការដ្ឋាន និងមេធាវីតំណាងក្រុមហ៊ុន Sun smile import export Co.,LTD ដុតបំផ្លាញ និងកប់ចោល នាថ្ងៃទី៤ ខែវិច្ឆិកា ឆ្នាំ២០២៤។

ការដុតកម្ទេចចោលនូវគ្រាប់ពូជពោតចំនួន ៧៧១ការ៉ុងនេះ ដោយសារកម្លាំងការិយាល័យនគរបាល រកឃើញថា ជារបស់ក្លែងក្លាយ និងល្មើសកម្មសិទ្ធបញ្ញារបស់ក្រុមហ៊ុនដើមឈ្មោះ Sun smile import export Co.,LTD ។ ការដុតកម្ទេចចោលនៅគ្រាប់ពោតនេះ ធ្វើឡើងនៅទីលានចាក់សំរាម ដែលស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។

ស្នងការដ្ឋាននគរបាលខេត្តបាត់ដំបង បានឱ្យដឹងថា កាលពីថ្ងៃទី២១ ខែកុម្ភៈ ឆ្នាំ២០២៤ សមត្ថកិច្ចនគរបាល បានដកហូតនូវគ្រាប់ពូជពោតនិមិត្តសញ្ញា Sun smile 99999នេះ ក្រោយក្រុមហ៊ុន Sun smile import export Co.,LTD បានរកឃើញផលិតផលគ្រាប់ពូជពោតក្លែងក្លាយក្នុងក្រុមហ៊ុននេះ កំពុងចរាចរណ៍លើទីផ្សារមួយចំនួន ពិសេសក្នុងភូមិសាស្រ្តស្រុកជាប់ព្រំដែនកម្ពុជា-ថៃ ដែលវត្ថុតាងនេះ បានយកមករក្សាទុកនៅស្នងការដ្ឋានខេត្តបាត់ដំបង៕